Հայաստանի վարչապետ Նիկոլ Փաշինեան Նիւ Եորքի մէջ տեսակցեաւ Թուրքիոյ նախագահ Ռեճեպ Թայիպ Էրտողանի հետ: Երկու ղեկավարները քննարկեցին հայ-թրքական յարաբերութիւններու կարգաւորումին եւ հայ-ատրպէյճանական խաղաղութեան հոլովոյթին վերաբերող հարցեր: Անոնք մանրամասն անդրադարձան յարաբերութիւններու կարգաւորումի հոլովոյթի ծիրին մէջ կատարուած քայլերուն եւ առկայ պայմանաւորուածութիւններուն: Փաշինեան եւ Էրտողան ընդգծեցին կարգաւորումի հոլովոյթը առանց նախապայմաններու շարունակելու եւ յարաբերութիւններուն նոր ազդակ հաղորդելու պատրաստակամութիւնը: Երկու ղեկավարները խօսեցան նաեւ տարածաշրջանային հարցերուն մասին: Թուրքիոյ նախագահը Հայաստանի վարչապետին նուիրեց իր՝ «Աւելի արդար աշխարհ հնարաւոր է» գիրքը եւ իր աջակցութիւնը յայտնեց յարաբերութիւններու կարգաւորումին, իսկ Փաշինեան ներկայացուց Հայաստանի կառավարութեան «Խաղաղութեան խաչմերուկ» նախաձեռնութեան մանրամասնութիւնները:
Հայաստանի վարչապետը Միջազգային ճգնաժամային խումբի նախագահ ու գործադիր տնօրէն Քոմֆորթ Էրոյի հետ քննարկեց Ատրպէյճանի հետ խաղաղութեան պայմանագիր ստորագրելու բանակցութիւններն ու հնարաւորութիւնները: Զրուցակիցները անդրադարձան հայ-ատրպէյճանական խաղաղութեան պայմանագիր կնքելու բանակցութիւններուն եւ տարածաշրջանային հաղորդակցութիւնները ապաշրջափակելու առաջարկներուն:
