Մէկ տարի առաջ, 19 Սեպտեմբերին, Ատրպէյճանի կողմէ ռազմական յարձակման հետեւանքով Լեռնային Ղարաբաղի ամբողջ բնիկ բնակչութեան տեղահանութիւնը ցեղային զտման քաղաքականութեան վերջին փուլն էր, երէկ յայտարարեց Հայաստանի Արտաքին գործերու նախարարութիւնը՝ նշելով, որ աւելի քան 115.000 հայ քանի մը օրուան ընթացքին ստիպուած եղաւ լքել սեփական բնակավայրերը։
2023 թուականի 19-20 Սեպտեմբերին Ատրպէյճանի ռազմական յարձակման հետեւանքով աւելի քան 200 մարդ զոհուեցաւ, անոնցմէ 181-ը՝ զինուոր, 15 հոգի անհետ կորսուած է։ Պաշտօնական տուեալներով՝ ատրպէյճանական բանտերուն մէջ 23 հայ կայ, անոնցմէ 8-ը Արցախի ռազմաքաղաքական ղեկավարութիւնն է։
Յիշեցնելով, որ այս ամէնը տեղի ունեցաւ ՄԱԿ-ի Գլխաւոր նստաշրջանի ընթացքին, երբ ամբողջ միջազգային հանրութիււնը հերթական անգամ կը քննարկէր հակամարտութիւններու խաղաղ կարգաւորման, կայունութեան հաստատման ու զարգացման հրամայականը՝ դատապարտելով ուժի կիրառման, միջազգային օրէնքներու, մարդու իրաւունքներու խախտումներու դրսեւորումները աշխարհի տարբեր անկիւններուն մէջ: Հայաստանի արտաքին քաղաքական գերատեսչութիւնը ընդգծած է, որ յառաջիկայ շաբաթ Նիւ Եորքի մէջ կրկին պիտի մեկնարկեն ՄԱԿ-ի Գլխաւոր վեհաժողովի բարձրաստիճան քննարկումները։
Արտաքին գործերու նախարարութիւնը շեշտեց, որ վերջին մէկ տարուան իրադարձութիւնները ցոյց կու տան միջազգային կայունութեան ապահովման ուղղութեամբ անյետաձգելի ջանքերու, խաղաղութեան հաստատման հնարաւորութիւն տուող գաղափարներու, քայլերու կեանքի կոչման կարեւորութիւնը։
Պաշտօնական Երեւանը կը վերահաստատէ Հարաւային Կովկասի մէջ կայունութեան ապահովման հարցով Հայաստանի Հանրապետութեան դիրքորոշումը՝ խաղաղութեան եւ յարաբերութիւններու շուտափույթ հաստատում, հիմնուած ինքնիշխանութեան եւ տարածքային ամբողջականութեան յարգման, տարածաշրջանին մէջ կայուն զարգացման, արդիւնաւէտ փոխկապակցուածութեան, բարեկեցութեան ապահովման տեսլականի վրայ։
Հայաստանը շահագրգիռ միւս դերակատարներէն կ’ակնկալէ անհրաժեշտ քաղաքական կամքի եւ խաղաղութեան օրակարգին յանձնառութեան յստակ դրսեւորում։
