Հայաստանի տարածքային կառավարման եւ ենթակառուցուածքներու նախարար Գնէլ Սանոսեան անդրադարձած է օդագնացութեան ոլորտին մէջ իրականացուած աշխատանքներուն։
Նախարարին խօսքով՝ աշխատանքային խումբը կը բանակցի «Զուարթնոց» եւ «Շիրակ» օդակայաննեունի հետ, եւ, պայմանագրի որոշ կէտեր համաձայնեցնելով, փորձ կը կատարուի ունենալ նոր ներդրումային ծրագիր, որ «Զուարթնոց» եւ «Շիրակ» օդակայաններուն մէջ պիտի բերէ շարք մը ենթակառուցուածքներու բարելաւման:
«Մեր թիրախն ու նպատակն է ունենալ այնպիսի պայմաններ, որ կարենանք 10 միլիոն մարդու սպասարկել մեր օդակայաններուն մէջ։ Մեզի համար չափազանց կարեւոր են ներքին՝ դէպի Կապան թռիչքները, որ արդէն շաբթուան մէջ 3 անգամ կայ։ Մեր նպատակն է Կապանի օդակայանը դարձնել միջազգային կամ տարածաշրջանային օդակայան, որ ոչ միայն թռիչքներ կ’իրականացնէ դէպի Երեւան, այլեւ դրացի երկիրներու յարակից որոշ քաղաքներ»,- ըսած է ան։
Սանոսեան ըսւ, որ օդանաւային նոր ընկերութիւններ կան, ընդհանուր առմամբ, 45 ուղղութեամբ. «Նոյեմբերին կը սպասենք Երեւանի եւ Տելհիի միջեւ կապին։ Գործուն աշխատանք կը տանինք դէպի Նիւ Եորք եւ Լոս Անճելըս օդային ուղիղ կապի հաստատման համար։ 2025 թուականին այդ ուղղութեամբ արդէն արդիւնք կ’ունենանք»։
