Իսրայէլեան բանակի ձայնասփիւռը հաղորդեց, որ բանակի մարտական խումբեր Այսրյորդանանէն կը տեղափոխուին Լիբանանի հետ սահման՝ առ ի պատրաստութիւն համապարփակ պատերազմի կարելիութեան:
Երէկ «Ուոլ Սթրիթ Ճուրնըլ»-ը, վկայակոչելով հաւաստի աղբիւրներ, յայտնեց, որ Լիբանանի մէջ տեղի ունեցած պայթումները համընկնած են Իսրայէլի կողմէ Կազայի հատուածէն հիւսիսային ճակատ տեղափոխուելուն հետ:
Աղբիւրները նշեցին, որ Հըզպալլան անցեալ տարի ապսպրած է աւելի քան 5000 նոր «փէյճըր» սարքեր եւ անոնք բաժնուած են իր անդամներուն, աւելցնելով որ Հըզպալլան կը կարծէ, որ այդ սարքերուն մեծ մասը խանգարուած է, ինչ որ յանգեցուցած է անոնց պայթումին, բացատրելով որ նոր «փէյճըր»ները հասած բոլոր անդամներուն: Անոնք, որոնք հին սարքեր ունէին չվնասուեցան: «Էյ.Պի.Սի.»-ն հաղորդեց, որ իսրայէլեան բանակի 98-րդ գունդը պիտի տեղադրուի Լիբանանի սահմանին մօտ, որ աշխուժ դերակատարութիւն ունեցաւ Կազայի մէջ: Միւս կողմէ, «Ուոլ Սթրիթ Ճուրնըլ» մէջբերեց նաեւ ամերիկացի պատասխանատուներուն խօսքերը, ըստ որոնց, Ուաշինկթըն ծրագիր մշակած է Լիբանանէն ամերիկացի քաղաքացիները եւ ոչ-մարտական անձեր տեղափոխման համար: Անոնք նշեցին, որ ծրագրերէն մէկը կը ներառէ մօտ 50.000 ամերիկացի քաղաքացիներու եւ բնակիչներու ու անոնց ընտանիքներուն տեղափոխումը Կիպրոս: Ամերիկացի պատասխանատուները, ըստ թերթին, յայտնած են, թէ ոչ մէկ նշոյլ կայ Իսրայէլի մօտալուտ ներխուժման մասին Լիբանան, եւ բացատրած են, որ Իսրայէլը կրնայ արագ, աւելի փոքր գործողութիւն կատարել առանց մեծ ռազմական շարժումներու: Անոնք աւելցուցին, որ Միացեալ Նահանգներու Պաշտպանութեան նախարարութիւնը մտահոգ է Լիբանանի Իսրայէլի եւ Հըզպալլայի միջեւ ցամաքային պատերազմի բռնկման հնարաւորութեամբ:
