Հայաստան կ՛ակնկալէ, որ վիզաներու ազատականացման գործընթացը իր աւարտին հասնի 2-3 տարուան ընթացքին: Արտաքին գործերո փոխնախարարներ Պարոյր Յովհաննիսեան եւ Վահան Կոստանեան այայտնեցին, թէ մօտաւորապէս այդքան ժամանակ կը պահանջուի Հայաստանէն՝ անհրաժեշտ բարեփոխումներ իրականացնելու համար:
Պրիւքսէլի հետ վիզաներու ազատականացման հարցով երկխօսութիւնը մեկնարկեց անցեալ շաբաթ:
«Կը կարծեմ, որ իրատեսական է երկու-երեք տարուան մէջ աւարտել գործընթացը: Հայկական կողմը պատրաստակամ է, առանց ժամանակ կորցնելու, յառաջ ընթանալու: Յոյս ունինք, որ կարճ ժամանակի մէջ կը հասնինք դրական արդիւնքներու», ըսաւ Կոստանեան:
Յովհաննիսեան իր կարգին աւելցնելով՝ ըսաւ. «Անյաղթահարելի որեւէ բան չկայ: Աշխատանք կը պահանջուի բոլոր նախարարութիւններուն հետ, ներառեալ Արտաքին գործերու նախարարութիւնը, թէ՛ Պրիւքսէլի, թէ՛ անդամ երկիրներու հետ, բայց կը կարծենք՝ այդ գործընթացը պիտի կարենանք տանիլ հնարաւորինս արագ: Բաւականին լաւատեսական տրամադրուած ենք. Կը կարծեմ՝ երկու-երեք տարի առնուազն պէտք պիտի ըլլայ, որ աւարտենք այդ բոլոր գործընթացները»:
Հայաստանցիներուն համար Եւրոպական միութեան վիզայի դրութիւնը պիտի վերցուի, եթէ Երեւան զգալի բարեփոխումներ կատարէ շարք մը ուղղութիւններով՝ մարդու իրաւունքներէն, փտածութենէն եւ կազմակերպուած յանցաւորութեան դէմ պայքարէն մինչեւ առողջապահական համակարգի բարեփոխումներ:
Միւս կողմէ, Հայաստանի մօտ Եւրոպական միութեան պատուիրակութեան ղեկավար Վասիլիս Մարաքոս տակաւին կանուխ կը նկատէ Հայաստան-Եւրոպական միութիւն մուտքի արտօնագրերու ազատականացման գործընթացի մանրամասնութիւններուն մասին խօսիլը՝ միաժամանակ յայտնելով, որ միացեալ ջանքերով կարելի պիտի ըլլայ հասնիլ այդ կարեւոր նպատակի իրագործման:
