Ֆրանսան կ’աջակցի Հայաստանի վարչապետին առաջարկած «Խաղաղութեան խաչմերուկ» նախագիծին:
Այս մասին ըսաւ Ֆրանսայի Եւրոպայի եւ արտաքին գործերու նախարար Սթեֆան Սեժուրնէն, Երեւանի մէջ իր հայ գործընկերոջ հետ համատեղ ասուլիսի ընթացքին:
«Մենք մեծապէս կ’աջակցինք Հայաստանի վարչապետին առաջարկած «Խաղաղութեան խաչմերուկ» նախագիծին: Հայաստանը շատ կարեւոր դեր կրնայ խաղալ Ասիոյ եւ Եւրոպայի հաղորդակցութեան համար՝ յարգելով իւրաքանչիւրին ինքնիշխանութիւնը»,-ըսաւ ան:
Հայաստանի եւ Ֆրանսայի արտաքին գործերու նախարարները իրենց հանդիպման ընթացքին խօսած են նաեւ Հայաստանի եւ Ատրպէյճանի յարաբերութիւններուն մասին:
«ֆրանսան կ’աջակցի պայմանագրի ստորագրման, որ արդար ու կայուն խաղաղութիւն պիտի հաստատէ՝ յարգելով երկու երկիրներուն ինքնիշխանութիւնը, տարածքային ամբողջականութիւնը: Սա Ալմա-աթայի մէջ 1991-ին ստորագրուած փաստաթուղթին ամբողջ իմաստն է: Փրակի մէջ եւս քաղաքական հանրութեան այս նոյն գաղափարը ներկայացուած է 2022-ին»,- ըսաւ Ֆրանսայի արտաքին գործերու նախարարը՝ կարեւորելով խաղաղութեան հաստատումը:
Անդրադառնալով Հայաստանի եւ Ատրպէյճանի միջեւ սահմանազատման գործընթացին՝ ան ըսաւ, որ 30 Օգոստոսին ձեռք բերուած համաձայնութիւնը ճիշդ ուղղութեամբ կ’երթայ: Ֆրանիան կ’աջակցի այդ գործընթացին՝ հիմնուելով ինքնիշխանութեան եւ տարածքային ամբողջականութեան սկզբունքներուն:
«Հարաւային Կովկասը պէտք է դառնայ խաղաղութեան եւ համագործակցութեան շրջան մը, որ հնարաւորութիւն պիտի տայ զարգացնելու առեւտուրը, Հայաստանն ալ պիտի բարգաւաճի»,- նշեց Սեժուրնէն:
Ան ընդգծեց, որ Հայաստանը, Ֆրանսան, միջազգային հանրութիւնը խաղաղութիւն կը փափաքին:
«Քանի որ Ատրպէյճանը շուտով պիտի հիւրընկալէ COP29-ը, անոր պատասխանատուութիւնն է ցոյց տալ, որ անկեղծօրէն կը փափաքի հասնիլ այդ խաղաղութեան նախքան COP29-ը: Կը կարծեմ՝ պէտք է կարենալ շատ արագ յառաջ երթալ այս թեմային ուղղութեամբ»,- ըսաւ Սեժուրնէն:
