Միջին Արեւելքի հարցով ամերիկացի յատուկ պատուիրակ Ամուս Հոքշթայն տեսակցեցաւ Իսրայէլի պաշտպանութեան նախարար Եոաւ Կալանթի հետ՝ քննարկելու Կազայի պատերազմն ու տարածաշրջանային զարգացումները: Կալանթ ամերիկացի պատուիրակին յայտնեց, թէ «հիւսիսային շրջանէն տեղահանուած բնակիչները տուն վերադարձնելու միակ միջոցը ռազմական է»: Կալանթի համաձայն, լիբանանեան ճակատին լարուածութիւնը մեղմելու դիւանագիտական միջոցները կը սպառին, նկատի առնելով որ Հըզպալլա սահմանային դրութիւնը կ’առնչէ Կազայի եւ Համասի հետ: Իսկ վարչապետ Պենիամին Նեթանիահու Հոքշթայնին յայտնեց, որ «հիւսիսի մէջ իրավիճակը այսպէս կարելի չէ շարունակուի եւ մենք ամէն ինչ պիտի ընենք, որպէսզի տեղահանուած բնակիչները վերադառնան իրենց տուները»: Վարչապետը շեշտեց, որ քաղաքացիները չեն կրնար հիւսիս վերադառնալ, եթէ ապահովական դրութեան արմատական փոփոխութիւն չըլլայ: Ըստ իսրայէլեան լրատուամիջոցներուն, Ուաշինկթընի պատուիրակը ահազանգած է, թէ Լիբանանի դէմ լայնածաւալ պատերազմի շղթայազերծումը ոչ միայն տուն պիտի չվերադարձնէ Կազայի գերիները, այլ նոր խնդիրներ պիտի յառաջացնէ Թել Աւիւի կառավարութեան առջեւ:
