Գեղեցիկ երեւոյթ է հիւրընկալել զաւակիդ ընկերները տան մէջ, որպէսզի անոնք միասին զբաղին եւ լեցնեն իրենց դա-տարկ ժամերը, մանաւանդ գիտնալով, որ այս կրկնուող հանդիպումները կը զարգացնեն զաւկիդ ընկերային հմտութիւնները, որոնք շատ կարեւոր են հաւասարակշռուած աճ մը ունենալու եւ անոր ակադեմական եւ ասպարէզային կեանքին մէջ խոստացուած յաջողութեան հասնելու համար:
Այս այցելութիւնները եւ հիւրընկալութիւնները ունին հիմնական օրէնքներ, որոնցմէ են հետեւեալները.
* Փոքր «հիւր»իդ ծնողքին հետ նախապէս հաստատէ այցելութեան ժամանակը եւ վայրը:
* Հեռաձայնով անոր ծնողքին հաւանութիւնը առ եթէ փափաքիս պզտիկները տանիլ աննախատեսուած անակնկալ պտոյտի մը, ինչպէս՝ ճաշարան մը կամ պարտէզ մը:
* Զաւկիդ որոշումը յարգէ՛ իր սրտին մօտիկ եղող ընկերներ ընտրելու մէջ եւ չըլլայ թէ խստօրէն վերապահ գտնուիս անոնցմէ մէկուն նկատմամբ, բացի երբ միջամտութեան անհրաժեշտ պատճառներ գոյութիւն ունենան:
* Քաջալերէ զինք, որ իր խաղալիքները փոխ տայ ընկերոջ, սակայն մի ստիպեր եթէ չուզէ (կրնայ օգտակար կէտ մը ըլլալ եթէ ընկերն ալ իր անձնական խաղալիքներէն քանի մը հատը բերէ, ինչ որ կը դիւրացնէ փոխ տալ եւ առնելու գործողութիւնը):
* Բոլորին վրայ խիստ օրէնքներ բանեցուր պատշաճ վարուելակերպ ունենալու հարցով (իրարու վնաս չհասցնելու, չկռուելու, չխածնելու եւ այլն):
* Կէսօրին հրամցուր սննդարար ուտելիք մը, որուն ընթացքին նստիր իրենց հետ, ինչ որ առիթ պիտի տայ քեզի մօտէն ծանօթանալու ընտանիքիդ պզտիկ բարեկամներուն հետ:
* Ժամանակէն քիչ մը առաջ զգուշացուր իրենց հանդիպման աւարտը մօտենալուն մասին:
* Խնդրէ իրենցմէ հաւաքել ու տեղերը դնել իրենց խաղցած խաղալիքները, եթէ այս մէկը գործադրուած օրէնք մըն է ձեր տան մէջ:
* Զաւակիդ սորվեցուր իր հիւրը քաղաքավար ձեւով ճամ-բելու կանոնները, ինչպէս օրինակի համար՝ անոր հետ մինչեւ դուռին քով երթալ եւ անոր տալ հրաժեշտի ողջոյն, ըստ պատշաճութեան ճանչցուած եւ որդեգրուած օրէնքներուն:
