Հայաստանի Հանրապետութիւնը հետաքրքրուած է Հնդկաստանէն յաւելեալ քանակութեամբ 155 մմ տրամաչափի «ATAGS» հրետանային կայանքներու ձեռքբերման հարցով:
Այս մասին յայտնած է Հնդկաստանի պաշտպանական հետազօտութիւններու եւ վերլուծութեան հիմնարկի գլխաւոր տնօրէն Սուտան Չինոյը։
«ATAGS-ները շատ մանեւրող կայանքներ են։ Անոնք արտադրուած են Հնդկաստանի մէջ եւ ունին մեծ յաջողութիւն։ Հայկական կողմը 6 նման սարք ձեռք բերած է եւ գոհ մնացած է գնումէն»,- ըսած է Սուտան Չինոյը՝ յիշեցնելով, որ Տելհին արդէն Երեւան առաքած է «Swathi» ռատիօտեղանքի համալիրներ, իսկ տուեալ գործարքին արժէքը կազմած է 40 միլիոն տոլար: Անոր գնահատմամբ՝ հնդկական Համազարկային կրակի համակարգերը աշխարհի մէջ լաւագոյններէն են եւ մեծ պահանջարկ ունին:
Հնդկաստանի պաշտպանական հետազօտութիւններու եւ վերլուծութեան հիմնարկի գլխաւոր տնօրէնը նաեւ յաւելած է, որ Հայաստանը հետաքրքրութիւն ցուցաբերած է նաեւ մօտ 250 միլիոն տոլար արժողութեամբ «Pinaka» բազմափող հրթիռային կայանքներու նկատմամբ։
Չինոյը կը կարծէ, որ Հայաստանը նոյնպէս պաշտպանական արդիւնաբերութեան զարգացման ներուժ ունի, որ ներկայիս կեդրոնացած է սթարթափներու վրայ։
«Հայաստանի մէջ կը գործեն երեք այդպիսի ընկերութիւններ, ինչ որ քիչ չէ, եթէ հաշուի առնենք երկրին մասշտապներն ու բնակչութեան թիւը։ Հնդկաստանի մէջ կայ 120 այդպիսի ընկերութիւն: Այնպէս որ, ռազմական արհեստագիտութիւններու ոլորտին մէջ, Երեւանն ու Տելհին կրնան աշխոյժ համագործակցութիւն հաստատել», – ըսած է Չինոյը։
Աւելի վաղ, լրատուամիջոցները գրած էին, որ 155,5 միլիոն տոլարի կատարելագործուած քարշակուող հրետանային համակարգերը (ATAGS) Երեւանը պատուիրած է 2022 թուականին։ 155 մմ քարշակուող հաուպիցներու առաջին խմբաքանակը՝ բաղկացած 6 միաւորէ, մատակարարուած է 2023 թուականի Օգոստոսին։
Հնդկաստանի Պաշտպանութեան նախարարութեան տուեալներուն համաձայն՝ 2024-2025 թուականներու ֆինանսական տարուան ընթացքին Հայաստանի կողմէ հնդկական արտադրութեան սպառազինութեան գնումներու ընդհանուր ծաւալը հասած է 600 միլիոն տոլարի։
Հայաստանը 2021 թուականէն սկսեալ Հնդկաստանէն ձեռք կը բերէ հրթիռներ, հրետանային համակարգեր, հակաօդային պաշտպանութեան համակարգեր եւ այլ զինատեսակներ։
