ԱՄՆ ՀԵԼՍԻՆՔԵԱՆ ՅԱՆՁՆԱԺՈՂՈՎԻ ՆԱԽԱԳԱՀ
ԱՄՆ գոնկրէսականներն ու ծերակուտականները մասնակցած են Հելսինքեան յանձնաժողովի՝ Հայաստանին վերաբերող լսումներուն, որոնց շրջանակին մէջ ողջունած են Հայաստանի արտաքին քաղաքական շրջադարձը դէպի Արեւմուտք:
Լսումները նպատակ ունեցած են ուրուագծել ուղիներ, որոնցով Միացեալ Նահանգները եւ գոնկրէսը կրնան աջակցել Հայաստանին՝ շարունակելու իր ժողովրդավարական ուղին, ապահովելու ինքնիշխանութիւնը, վերջնականապէս հաստատելու խաղաղութիւն եւ կարգաւորելու յարաբերութիւններն Ատրպէյճանի եւ Թուրքիոյ հետ, ինչպէս նաեւ զսպելու Ռուսաստանի՝ տարածաշրջանին մէջ գերիշխելու ջանքերը:
«Հայաստանը կանգնած է ճակատագրական խաչմերուկի վրայ: Միացեալ Նահանգները կրնայ բացառիկ եւ որոշիչ դերակատարում ունենալ Հայաստանի՝ խաղաղ, ժողովրդավար, կայուն, ապակայունացնող տարրերէ զերծ ապագային աջակցելու հարցով»,- ըսած է Հելսինքեան յանձնաժողովի նախագահ Ճօ Ուիլսընը:
Ան ընդգծած է, որ այսօր Հայաստանը կը բախի նոր մարտահրաւէրներու, սակայն երկրին ներուժը հնարաւոր է կեանքի կոչել միայն Արեւմուտքի հետ իրական համարկման միջոցով՝ խորացնելով կապերը Եւրոպայի, ԱՄՆ-ի, անոնց դաշնակիցներուն հետ:
«Հայաստանը խիզախ քայլեր ձեռնարկած է` պաշտպանելու անկախութիւնը եւ ինքզինք հեռացնելու Փութինի ազդեցութենէն: Այս որոշումները հեշտ չեն տրուած, յատկապէս տարածաշրջանին մէջ, ուր Փութինի ազդեցութիւնը ամէնուր է: Մոսկուան անընդհատ ցոյց տուած է, որ կը նախընտրէ Հայաստանն ու անոր հարեւանները տեսնել հակամարտութեան մէջ: Այս ռազմավարութիւնը նախատեսուած է Ռուսաստանի գերիշխանութիւնը պահպանելու համար»,- շարունակած է Ուիլսըն:
Ըստ անոր՝ Ռուսաստանը կ’ուզէ վերստեղծել ԽՍՀՄ-ը, սակայն հայ ժողովուրդը այլ բան կ’ուզէ:
«Անոնք կ’ուզեն խաղաղութիւն, ժողովրդավարութիւն, դուրսէն միջամտութենէ զերծ ապագայ… այստեղ ԱՄՆ-ն պէտք է որոշիչ դերակատարում ունենայ: Մենք պէտք է այնտեղ ըլլանք՝ աջակցելու Հայաստանին ժողովրդավարութեան կառուցման հարցով, շտկելու տնտեսական եւ քաղաքական իրավիճակը»,- ըսած է Հելսինքեան յանձնաժողովի նախագահը:
Այս լսումներուն նախորդած էր Հելսինքեան յանձնաժողովի անդամ օրէնսդիրներուն Յուլիսին կայացած ճանաչողական այցը Հայաստան, որուն ընթացքին անոնք արձանագրած են Հայաստանի անկայուն ռազմավարական իրավիճակը, բայց միեւնոյն ժամանակ անոր դիմացկունութիւնը, տարածաշրջանին մէջ ժողովրդավարութեան օրինակ ծառայելը եւ հասարակական-քաղաքական համախոհութիւնը՝ յօգուտ եւրոպական ապագայի:
