Խորհրդարանի նախագահ Նեպիհ Պըրրին հաստատեց, որ Լիբանան պատերազմ չ’ուզեր, բայց իրաւունք ունի եւ ի վիճակի է պաշտպանել ինքզինք։
Պըրրի այս յայտարարութիւնը կատարեց Եւրոպական միութեան արտաքին եւ անվտանգութեան քաղաքականութեան գերագոյն ներկայացուցիչ Ժոզեփ Պորելի հետ Այն Թինէի մէջ կայացած հանդիպման ժամանակ, ուր ներկայացուեցաւ Լիբանանի եւ շրջանի ընդհանուր իրավիճակը՝ Կազայի եւ Լիբանանի դէմ Իսրայէլի շարունակական յարձակումները, ինչպէս նաեւ անոր ապահովական ու քաղաքական մարտահրաւէրները, որոնք կը խոչընդոտեն անվտանգութիւնն ու կայունութիւնը Միջին Արեւելքի մէջ։ Պըրրի մատնանշեց Պորելին, որ ան ականատես եղաւ իսրայէլեան ամբարտաւանութեան եւ ոտնձգութիւններուն Լիբանանի դէմ՝ հարաւային Լիբանանի Նաքուրա քաղաքի մէջ ԵՈՒՆԻՖԻԼ-ի ուժերուն կատարած այցելութեան ժամանակ: Ինչ կը վերաբերի ներքին քաղաքական իրավիճակին, խորհրդարանի նախագահը նկատեց, որ կառավարութիւնը կ’աշխատի սահմանադրութեամբ իրեն վերապահուած լիազօրութիւններուն համապատասխան, յատկապէս նախագահական թափուր պաշտօնին ժամանակ, եւ «մենք ամենայն լրջութեամբ կ’աշխատինք աւելի քան մէկ տարի առաջ մեր առաջադրած նախաձեռնութիւնը իրականացնելու համար», ըսաւ ան։Ժոզեփ Պորել արտաքին գործոց նախարարութենէն մատնանշեց, որ Լիբանանի համար կան բացասական հետեւանքներ՝ կապուած Սուրիոյ ճգնաժամի եւ Կազայի պատերազմին հետ, եւ աւելցուց, որ պատերազմի թմբուկը չէ դադրած անցած Յունուարին Լիբանան իր այցելութենէն ի վեր։
