Վարչապետի պաշտօնակատար Նեժիպ Միքաթիի վերջին պահուն հրապարակած հրաւէրով, գործող կառավարութիւնը երէկ յետմիջօրէի ժամը 3-ին վարչապետարանին մէջ գումարեց անակնկալ նիստ մը՝ օր մը առաջ ցուցարարներու ճնշումին տակ յետաձգուած նիստին փոխարէն: Վարչապետի պաշտօնակատարը յայտնեց, որ կառավարութեան համար առաջնահերթութիւն է քաղաքացիներուն իրաւունքները եւ իրենք պիտի չհրաժարին երկիրը տնօրինելու պարտականութենէն: Նիստին ընթացքին Միքաթի վերստին շեշտեց հանրապետութեան նոր նախագահ ընտրելու անհրաժեշտութիւնը՝ վերաշխուժացնելու համար պետական հաստատութիւններուն գործունէութիւնը: Միքաթիի մամլոյ գրասենեակը հաղորդագրութեամբ մը մեկնաբանեց հանրային ոլորտի աշխատակիցներուն աշխատավարձերու յաւելումին հարցով վարչապետին ուղղուած ամբաստանութիւնները եւ շեշտեց, որ կառավարութիւնը կը մշակէ յաւելումներու ամբողջական ծրագիր մը, որ կը վերաբերի նաեւ գործող եւ թոշակառու զինուորականներուն: «Այժմ աշխատանք կը տարուի օրինագիծի սեւագրին մէջ ներառելու որոշ փոփոխութիւններ, որպէսզի ան ըլլայ բարեկարգչական», յայտարարեց Միքաթիի գրասենեակը՝ յիշեցնելով, որ կառավարութիւնը կը մտադրէ նաեւ ժամանակաւոր յատկացումներ տրամադրել հանրային պաշտօնեաներուն, մինչեւ մայր օրէնքի վերջնական վաւերացումը: Միքաթի զարմանալի որակելով դատապարտեց կազմակերպուած ցուցարարները, «որոնք կը շարժին թոշակառու զինուորականներուն իրաւունքները պաշտպանելու խորագրով, սակայն խորքին մէջ կը փորձեն յեղաշրջիլ պետութեան եւ հատատութիւններուն դէմ՝ անդամալուծելով երկիրը»:
