Հայաստանի մէջ ամուսնութեան տարիքային շեմ կը սահմանուի 18 տարեկանը՝ առանց բացառութեան։ Նախագիծը երէկ Ազգային ժողովի նիստին ընդունուեցաւ ամբողջութեամբ։
Նախագիծին հեղինակը «Քաղաքացիական պայմանագիր»ի պատգամաւոր, ազգութեամբ եզտի Ռուստամ Բաքոյեանն է։ Անոր խօսքով՝ եզտիներուն մօտ վաղ ամուսնութիւնը աւանդոյթ չէ, այլ՝ արատաւոր սովորոյթ, որ արմատացած է։
Ներկայիս գործող ՀՀ օրէնսդրութեան համաձայն՝ ամուսնութեան տարիքը 18 տարեկանն է, սակայն անձը կրնայ ամուսնանալ նաեւ 16 տարեկանին, եթէ անոր զուգընկերոջ 18 տարին արդէն լրացած է եւ կայ ծնողներուն, որդեգրողներուն կամ խնամակալին համաձայնութիւնը:
