ՀՀ կառավարութիւնը եւ Եւրոպական Յանձնաժողովը հանդէս եկած են համատեղ մամուլի հաղորդագրութեամբ՝ նշելով, որ Երեւանի մէջ Հայաստանի Հանրապետութեան եւ Եւրոպական Յանձնաժողովի կողմէ յայտարարուեցաւ մուտքի արտօնագրերու ազատականացման շուրջ երկխօսութիւնը մեկնարկած է:
Այս գործընթացին նպատակն է աջակցիլ Հայաստանին՝ սահմանելու առանց մուտքի արտօնագրերու դէպի ԵՄ երկիրներ կարճաժամկէտ այցերու համար՝ արդիւնաւէտ կառավարուող շարժունակութեան եւ անվտանգութեան անհրաժեշտ պայմաններու ապահովմամբ:
Մուտքի արտօնագրերու շուրջ երկխօսութիւնը Հայաստան-ԵՄ յարաբերութիւններու աւելի լայն շրջանակի մէկ մասն է, որ զգալի յառաջընթաց արձանագրած է 2017 թուականին Հայաստան-ԵՄ Համապարփակ եւ ընդլայնուած գործընկերութեան համաձայնագրի (ՀԸԳՀ) ստորագրումէն ի վեր: Երկխօսութեան շրջանակներուն մէջ գործադրուող շարունակական ջանքերը պիտի աջակցին Հայաստանի մէջ իրականացուող բարեփոխումներու համապարփակ օրակարգին, մասնաւորապէս՝ այն ոլորտներուն մէջ, որոնք առանցքային են ԵՄ երկիրներ առանց մուտքի արտօնագրերու ճամբորդելու համար, ինչպիսիք են՝ փաստաթուղթերու անվտանգութիւնը, սահմաններու եւ գաղթի կառավարումը, փտածութեան եւ կազմակերպուած յանցաւորութեան դէմ պայքարը, ինչպէս նաեւ հիմնարար իրաւունքներու պաշտպանութիւնը:
Երկխօսութեան մեկնարկին համար հիմք հանդիսացած է «Հայաստանի Հանրապետութեան եւ Եւրոպական Միութեան միջեւ մուտքի արտօնագրերու տրամադրումը դիւրացնելու մասին», ինչպէս նաեւ «Հայաստանի Հանրապետութեան եւ Եւրոպական Միութեան միջեւ առանց թոյլտուութեան բնակող անձերու յետընդունման մասին» համաձայնագրերու յաջող իրականացումը, որուն շնորհիւ 2014 թուականի Յունուար 1-էն ճամբորդութեան ընթացակարգերը պարզեցուած են բազմաթիւ հայ քաղաքացիներու համար։ Ներկայիս ԵՄ բոլոր քաղաքացիները ազատուած են Հայաստան մուտքի արտօնագրի պահանջէն:
