Հայաստանն ու Թուրքիան կրնան լուծել բոլոր խնդիրները եւ լիովին կարգաւորել յարաբերութիւնները նոյնիսկ վաղը, եթէ թրքական իշխանութիւնը քաղաքական կամք դրսեւորէ։ Երեւանի մէջ տեղի ունեցած՝ «Երեւանեան երկխօսութիւն» միջազգային համագումարին ժամանակ այս մասին յայտնած է ՀՀ Ազգային ժողովի փոխխօսնակ, Թուրքիոյ հետ յարաբերութիւններու կարգաւորման հարցերով յատուկ ներկայացուցիչ Ռուբէն Ռուբինեան։
«Իրականութեան մէջ Հայաստանի բոլոր կառավարութիւնները 1991 թուականէն՝ մեր երկրի անկախացումէն ի վեր, երբեւէ պատմութիւնը չեն դրած Թուրքիոյ հետ բանակցային գործընթացի մէջ, մենք միշտ պատրաստ եղած ենք բանալու սահմանները եւ հաստատելու դիւանագիտական յարաբերութիւններ, եւ եթէ մեր թուրք հարեւանները քաղաքական կամք դրսեւորեն, ապա կրնանք լիովին կարգաւորել յարաբերութիւնները նոյնիսկ վաղը»,- ըսած է ան։
Չնայած ընդհանուր սահմանին՝ Հայաստանի եւ Թուրքիոյ միջեւ չկան դիւանագիտական յարաբերութիւններ։ 1993 թուականէն Թուրքիան փակած է Հայաստանի հետ սահմանը։
2021 թուականին Թուրքիան եւ Հայաստանը կարգաւորման հարցերով յատուկ ներկայացուցիչներ նշանակած են. Թուրքիոյ յատուկ ներկայացուցիչն է Սերտար Քըլըչը, իսկ Հայաստանինը՝ Ռուբէն Ռուբինեանը։
Առաջին հանդիպումը տեղի ունեցած է 2022 թուականի Յունուար 14-ին Մոսկուայի մէջ, երկրորդը՝ 2022 թուականի Փետրուար 24-ին Վիեննայի մէջ, երրորդը՝ 2022 թուականի Մայիս 3-ին, իսկ չորրորդը՝ 2022 թուականի Յուլիս 1-ին, Վիեննայի մէջ։
5-րդ հանդիպումը Մարկարա սահմանային կէտին վրայ կայացած է 2024 թուականի Յուլիս 30-ին։
