Հայաստան-Ատրպէյճան սահմանազատման յանձնաժողովներու համատեղ աշխատանքի մասին կանոնակարգի սահմանադրականութեան հարցը Սահմանադրական դատարանին մէջ պիտի քննարկուի 24 Սեպտեմբերին։
30 Օգոստոսին Հայաստանի Արտաքին գործերու նախարարութիւնը յայտնեց, որ Հայաստանն ու Ատրպէյճանը ստորագրած են սահմանագծման եւ սահմանազատման յանձնաժողովներու համատեղ գործունէութեան մասին կանոնակարգը։
Ըստ փաստաթուղթին` Երեւանն ու Պաքուն համաձայնած են սահմանազատումը իրականացնել 1991 թուականի Ալմա Աթայի հռչակագրին վրայ, բայց այդ համաձայնութիւնը վերջնական չէ։
Կանոնակարգին մէջ նշուած է` գործընթացը հնարաւոր է հետագային` խաղաղութեան համաձայնագիրի ընդունումէն ետք, այլ սկզբունքներով ընթանայ։
Կանոնակարգը 7 յօդուած ունի, հիմնականին մէջ գործընթացին վերաբերող թեքնիք տուեալներ են, ընդհանրական ձեւակերպումներ։ 4-րդ յօդուածին մէջ, օրինակ, կը նշուի սահմանագիծը բարենպաստ դարձնելու հնարաւորութեան մասին։
5 Սեպտեմբերին Հայաստանի կառավարութիւնը հաւանութիւն տուաւ Ատրպէյճանի հետ սահմանազատման յանձնաժողովներու համատեղ աշխատանքի մասին կանոնակարգի վաւերացման։ Նոյն օրը փաստաթուղթը ղրկուեցաւ Սահմանադրական դատարան։
