Միացեալ Նահանգները պաշտօնապէս Իրանը մեղադրած է Ուքրանիոյ պատերազմին Ռուսիոյ փոքր հեռահարութեան բալիստիկ հրթիռներ մատակարարելու համար, յայտարարելով որ համապատասխան միջոցներ պիտի ձեռնարկի ներգրաւուածները պատժելու համար։ Այս մասին, ինչպէս նշած է «Էսոշիէյթըտ»ը, ըսած է Միացեալ Նահանգներու արտաքին գործերու Էնթոնի Պլինքըն՝ Բրիտանիոյ արտաքին գործերու նախարար Տէյվիտ Լամիի հետ միացեալ մամուլի ասուլիսի ընթացքին:
Անոր խօսքով՝ Միացեալ Նահանգները Երեքշաբթի օր պիտի յայտարարէ Իրանի դէմ նոր պատժամիջոցներու մասին՝ Ռուսիոյ հետ համագործակցութեան համար:
Ռուսիան ստացած է բալիստիկ հրթիռներ եւ, հաւանաբար, քանի մը շաբթուան ընթացքին անոնք պիտի օգտագործէ Ուքրանիոյ մէջ՝ ուքրանացիներուն դէմ:
Պլինքըն մանրամասնած է, որ պատժամիջոցներ պիտի ըլլան նաեւ «Iran Air» օդանաւային ընկերութեան դէմ:
«CNN»-ը եւ «Wall Street Journal»-ը, վկայակոչելով անյայտ աղբիւրներ, յայտնած են, որ Իրանը Ռուսիոյ փոխանցած է փոքր հեռահարութեան բալիստիկ հրթիռներ: «The Times»-ը, վկայակոչելով ուքրանական հետախուզութիւնը, յայտնեց, որ խօսքը, ըստ ամենայնի, 200 բալիստիկ հրթիռներու մասին է, որոնց հեռահարութիւնը կը հասնի 110 քիլոմեթրի։
Իրանը պաշտօնապէս հերքած է այս տեղեկութիւնները: ՄԱԿ-ի մէջ Իրանի մշտական ներկայացուցչութիւնը նշած է, որ Թեհրանը զէնք չէ մատակարարած Ուքրանիոյ հակամարտող կողմերուն, որովհետեւ անիկա կը նկատէ անմարդկային:
