Միացեալ ազգերու կազմակերպութեան (ՄԱԿ) Գլխաւոր վեհաժողովը յառաջիկայ շաբթուան իր նիստին հաւանաբար պիտի քուէարկէ պաղեստինեան բանաձեւի նախագիծի մը, որ Իսրայէլէն կը պահանջէ վեց ամսուան ընթացքին դադրեցնել իր «ապօրինի ներկայութիւնը բռնագրաւուած պաղեստինեան տարածքներուն մէջ»: Բանաձեւի նախագիծին հիմնական նպատակը, որ պատրաստուած է Պաղեստինի ինքնավարութեան կողմէ եւ զայն տեսած է «Ռոյթըրզ»ը, հաստատած է Արդարադատութեան միջազգային դատարանի Յուլիսին հրապարակուած խորհրդատուական կարծիքը: Հոն կ’ըսուի, որ Իսրայէլի կողմէ պաղեստինեան հողերու եւ տարածքներու բռնագրաւումը անօրինական է, եւ ան պէտք է քաշուի այդ վայրերէն։
