«Որեւէ բան, որ կ’ենթադրէ միջանցքի ստեղծում եւ անոր վերահսկողութեան յանձնում որեւէ այլ կողմի, չի քննարկուիր»:
Լրագրողներու հետ հանդիպման այս մասին ըսած է ՀՀ արտաքին գործերու նախարար Արարատ Միրզոյեան՝ արձագանգելով Նախիջեւանի ճանապարհի վերահսկողութիւնը մասնաւոր պահնորդական ընկերութեան յանձնելու մասին հարցումին։
Միրզոյեանի խօսքով՝ Հայաստանի համար երրորդ ուժերու ներկայութիւնը եւ երրորդ ուժերու կողմէ ճանապարհի վերահսկողութիւնը կը բացառուի։
«Մեզի համար ատիկա անընդունելի է, եւ մեր դիրքորոշման մէջ ոչինչ փոխուած է։ Իրականութեան մէջ որպէսզի մարդոց մօտ անվտանգութեան զգացողութիւնը մէկ աստիճանով ալ աւելնայ, մենք կրնանք ներգրաւել երկու երկիրներու մէջ ալ արտօնագրուած մասնաւոր պահնորդական ընկերութիւն, որ գնացքի մէջ կրնայ ուղեկցիլ բեռներուն կամ ուղեւորներուն»,- ըսած է Միրզոյեան։
