Իրան պիտի շարունակէ աջակցիլ տարածաշրջանի հաղորդակցութիւններու եւ կապուղիներու ապաշրջափակման, Երեւանի եւ Պաքուի միջեւ խաղաղութեան օրակարգի յառաջխաղացման, սակայն դէմ է միջազգային սահմաններու փոփոխութեան:
Հերթական ճեպազրոյցի ժամանակ այս մասին ըսած է Իրանի Ատաքին գորերու նախարարութեան խօսնակ Նասեր Քանաանին:
Քանաանի նշած է, որ Հարաւային Կովկասի մէջ խաղաղութիւնը պիտի ըլլայ տարածաշրջանի բոլոր երկիրներու օգտին:
«Իրանը կ’աջակցի Հարաւային Կովկասի մէջ խաղաղութեան ու կայունութեան, եւ մենք կ’ողջունենք տարածաշրջանի երկիրներու ինքնիշխանութեան շրջանակին մէջ կապուղիներու արգելափակման վերացումը։ Այս շրջանակը կրնայ օգնել ամրապնդել խաղաղութիւնը տարածաշրջանին մէջ։ Մենք նաեւ յստակօրէն դէմ կ’արտայայտուինք միջազգային սահմաններու որեւէ փոփոխութեան, որ կը հակասէ երկիրներու քաղաքական անկախութեան»,- յաւելած է ան:
Այլ գետնի վրայ, Հայաստանի Հանրապետութեան Անվտանգութեան խորհուրդի քարտուղարը շնորհակալութիւն յայտնած է Հայաստանի տարածքային ամբողջականութեան աջակցելու եւ միջազգային սահմաններու անփոփոխելիութեան մասին Իրանի Իսլամական Հանրապետութեան դիրքորոշման առնչութեամբ։
«Հայաստանի եւ Իրանի սահմանը խաղաղութեան, բարեկամութեան ու խաղաղ համակեցութեան սահման է: Հայաստանը յատուկ կարեւորութիւն կու տայ Իրանի Իսլամական Հանրապետութեան հետ յարաբերութիւններուն, եւ որեւէ ուժ չի կրնար խզել Իրանի եւ Հայաստանի տարածքային կապը»,- ըսած է ան:
Անվտանգութեան Խորհուրդի քարտուղարը, ընդգծած է, որ Հայաստանի տարածքին որեւէ ապաշրջափակում պիտի ըլլայ Հայաստանի ներքին հիմնարկներուն եւ անոր ազգային ու տարածքային ինքնիշխանութեան վերահսկողութեամբ:
