Հայաստանը չի կրնար մերժել ԱՊՀ-ի ձեւաչափը, որուն հիմնական փաստաթուղթը՝ Ալմա-աթայի հռչակագիրը, Ատրպէյճանի հետ բանակցային խօսակցութիւններուն մէջ որպէս հիմք դրուած է:
Այս մասին ըսաւ Ազգային ժողովի նախագահ Ալէն Սիմոնեանը՝ անդրադառնալով Հայաստանի՝ ԱՊՀ ոչ-պաշտօնական գագաթաժողովին մասնակցելու որոշման վերաբերեալ հարցին:
«ԱՊՀ-ի հիմքերէն մէկը կը հանդիսանայ Ալմա-աթայի հռչակագիրը, որով այսօր Հայաստանը իր բոլոր բանակցային ուղղութիւններով աշխատանք կը տանի: Եւ մենք չենք կրնար մերժել ձեւաչափ մը, որուն հիմնական փաստաթուղթը մեր բանակցային հիմնական խօսակցութիւններուն մէջ որպէս հիմք դրուած է: Ատիկա նաեւ անվտանգային առումով շատ կարեւոր է»,- ըսաւ Սիմոնեան:
Անդրադառնալով BRICS-ի առաջիկայ գագաթաժողովին Հայաստանի մասնակցութեան որոշման՝ ԱԺ նախագահը ըսաւ, որ տնտեսական առումով Հայաստանը կարեւոր կապեր ունի այդ կառոյցի անդամ որոշ երկիրներու հետ: Ըստ Սիմոնեանի՝ Հայաստանը պէտք չէ ինքզինք տարածաշրջանէն դուրս դնէ: «Այս իրավիճակին մէջ, երբ տարբեր պատժամիջոցներ կը գործեն, տարբեր ճանապարհներ կը փնտռուին երկիրներու, գերտէրութիւններու կողմէ տնտեսական հոսքերը որեւիցէ ձեւով տեղափոխելու, Հայաստանը պէտք է իր շահերէն ելլելով մասնակցի»,- նշեց ԱԺ նախագահը:
Սիմոնեան չհամաձայնեցաւ այն տեսակէտին, թէ այսպիսով Հայաստանի իշխանութիւնները ետ կը կանգնին դէպի ԵՄ երթալէ:
«Հայաստանի իշխանութիւնը եւ ժողովուրդը նոյն կարծիքին են: Մենք պէտք չէ մէկ ծայրայեղութենէն միւս ծայրայեղութիւն իյնանք: Մեր արժէքային համակարգը եւ տրամաբանութիւնը որեւիցէ ձեւով չէ փոխուած: Ատիկա պիտի ըլլայ Հայաստանի տնտեսութեան, իրաւունքներու, արժէքային համակարգին համահունչ ուղղութիւն: Եւ այդ ուղղութիւնը կը շարունակուի»,- յաւելեց ան:
