Սուրիոյ Համա քաղաքին մօտակայ Մասիաֆ շրջանի հիւանդանոցին տնօրէնը յայտնեց, որ երէկ արեւածագին շարք մը թիրախներ ռմբակոծած իսրայէլեան յարձակումը պատճառած է առնուազն 18 մահ եւ 43 վիրաւոր՝ ներառեալ վեց ծանր պարագայ: Նախապէս, պետական «Սանա» լրատու գործակալութիւնը հաղորդած էր, որ Լիբանանի օդային տարածքի հիւսիսարեւմուտքէն սկիզբ առած յարձակումը կեդրոնացաւ սուրիական զինուորական շարք մը դիրքերու վրայ:
Մարդկային իրաւունքներու սուրիական դիտարանը երէկ երեկոյեան յայտարարեց, թէ Մասիաֆ շրջանի ռմբակոծումը թիրախաւորած է ոչ միայն զինուորական շարք մը դիրքեր, այլ բժշկական եւ շտապ օգնութեան խումբեր, պատճառելով զոհեր, վիրաւորներ, մեծ հրդեհ եւ նիւթական ծանր վնաս:
