Պէյրութի աւագ քննիչի պաշտօնատար Պիլալ Հալաուի որոշեց կալանաւորել Լիբանանի Կեդրոնական դրամատան նախկին կառավարիչը՝ ելեւմտական հարցերով շարք մը ամբաստանութիւններու հետաքննութիւնները շարունակելու համար: Աւելի ուշ, դատախազ Հալաուի հարցաքննութեան նոր նիստ նշանակեց յառաջիկայ Հինգշաբթի օր:
Սալամէի պաշտպան փաստաբան Մարք Հապքա միւս կողմէ յայտնեց, որ նախկին կառավարիչին հարցաքննութիւնն ու կալանաւորումը սովորական որոշումներ են: «Դատախազը պարտաւոր է կալանաւորել Սալամէն՝ հարցաքննութիւնը շարունակելու նպատակով», ըսաւ փաստաբանը եւ անբնական համարեց երէկուան նիստին պայմանները, «որովհետեւ լրատուամիջոցները կը տարածեն անհիմն տեղեկութիւններ ու կը պնդեն, որ Սալամէ կը մերժէ ներկայանալ հարցաքննութեան, թէեւ իրականութիւնը հակառակն է», ըսաւ Հապքա: Ան բուռն քննադատեց նաեւ դատախազ Ղատա Աունը՝ Սալամէի ձերբակալութեան նուիրուած կարկանդակ հատելուն համար, տեղի ունեցածը համարելով առարկայական վարուելակերպէ հեռու արարք:
