Ժողովրդային բազմացող բողոքներուն եւ մասնաւորաբար թոշակառու զինուորականներուն արձակած սպառնալիքներուն զուգահեռ, վարչապետի պաշտօնակատար Նեժիպ Միքաթի գործող կառավարութիւնը հրաւիրեց նիստի, որ սկզբունքով պիտի գումարուի այսօր՝ սկսելու համար 2025-ի պետական ամավարկի նախագիծին քննարկումները: «Անակնկալ էր թոշակառու զինուորականներուն կոչերը՝ ցոյցի, ճամբաներ փակելու եւ նախարարներուն վարչապետարան գալուստը արգիլելու, թէեւ տակաւին չէ սկսած քննարկումները», ըսաւ Միքաթի, զինուորական եւ ապահովական կառոյցներէն պահանջելով այսօր անհրաժեշտ միջոցներուն ձեռնարկել՝ պահպանելու կարգն ու կանոնը եւ երաշխաւորելու պաշտօնակատար նախարարներուն վարչապետարան գալուստը՝ մասնակցելու համար նիստին: Միքաթիի յայտարարութիւնը դիտել տուաւ, թէ գործող կառավարութիւնը արդէն կը մտադրէ արծարծել ժամանակաւոր առաջարկներ՝ հանրային ոլորտի աշխատակիցներուն ընկերային օգնութիւն տրամադրելու մասին, մինչեւ պետական ամավարկի մշակումն ու վաւերացումը: Ըստ վարչապետի պաշտօնակատարին, նման աջակցութիւն մը հասանելի պիտի ըլլայ նաեւ գործող եւ թոշակառու զինուորականներուն:
