Ուքրանիոյ նախագահ Վոլոտիմիր Զելենսքի յայտնեց, որ Քիեւ կ’ուզէ վերջ տալ պատերազմին եւ վերահաստատել խաղաղութիւնը, մինչ ռուսերը կը փորձեն առաւելագոյնս գրաւել ուքրանական հողերը: «Ռուսիոյ Քուրսք շրջանին ուղղութեամբ մեր հակայարձակումը չէզոքացուց այդ շրջանէն մեր հողերուն վրայ լայնածաւալ նոր գործողութիւն մը իրականացնելու ռուսական պատրաստութիւնները», ըսաւ Զելենսքի:
Իսկ «CNN» լրատուական ցանցը հաղորդեց, որ ամերիկեան իշխանութիւնները վերջին շրջանին ռուսական զինուորական աշխուժութեան աճ նկատած են հաղորդակցութեանց ստորջրեայ գլխաւոր մալուխներուն շուրջ: Քանի մը օր առաջ, Ռուսիոյ արտաքին գործերու նախարար Սերկէյ Լաւրով Միացեալ Նահանգները զգուշացուցած էր երկկողմանի յարաբերութիւնները կառավարող կարմիր գիծերը հատելու վտանգաւոր հետեւանքներէն: «Ուաշինկթըն գիտէ, թէ ուր են այդ կարմիր գիծերը, սակայն կը սխալի խորհելով, թէ Ուքրանիոյ մէջ որեւէ մագլցումի հետեւանքներէն պիտի տուժէ միայն Եւրոպան», ըսած էր Լաւրով:
