Հայաստանի մէջ Իրանի դեսպան Մեհտի Սոպհանի վստահեցուց, որ «Զանգեզուրի միջանցք»-ին վերաբերող երազներն ու երազանքները երբեք պիտի չիրականանան: Լրագրողներու հետ զրոյցի ընթացքին դեսպանը նշեց, որ Թեհրան դէմ չէ հաղորդակցութիւններու տարածաշրջանային ապաշրջափակումին, սակայն կը պահանջէ, որ բոլոր գործողութիւնները ըլլան ազգային եւ պետական ինքնիշխանութեան շրջանակներուն մէջ:
Սոպհանի նաեւ յայտնեց, որ տարածաշրջանային համագործակցութեան «3+3» հարթակի յաջորդ հանդիպումին օրը արդէն որոշուած է: Ան շեշտեց, թէ յստակ թուական որոշուած է եւ այդ մասին պիտի յայտարարուի դիւանագիտական խողովակներով: Նախապէս հաղորդուած էր, որ նշեալ տեսակցութիւնը պիտի կայանայ Թուրքիոյ մէջ, արտաքին գործերու նախարարներու մակարդակով: Խորհրդակցական այս հարթակին առաջին նիստը գումարուած էր 2021-ի Դեկտեմբերին՝ մասնակցութեամբ հայ, ռուս, թուրք, իրանցի եւ ատրպէյճանցի նախարարներուն, իսկ երկրորդը Թեհրանի մէջ կայացած էր 2023-ի Հոկտեմբերին: Որպէս առաջին մեկնաբանութիւն, Հայաստանի Արտաքին գործերու նախարարութեան բանբեր Անի Պատալեան մերժեց որեւէ տեղեկութիւն փոխանցել նախարար Արարատ Միրզոյեանի մասնակցութեան մասին եւ բաւարարուեցաւ նշելով, որ նախարարին բոլոր հանդիպումներուն մասին կը յայտարարուի պատշաճ ժամանակին:
Յիշեցնենք, որ նշեալ հարթակին մաս կը կազմեն Հայաստանը, Ատրպէյճանը, Վրաստանը, Թուրքիան, Իրանը եւ Ռուսիան, սակայն Վրաստանը առաջին իսկ օրէն կը մերժէ մասնակցիլ նիստերուն:
