Միացեալ Նահանգներու փոխնախագահի պաշտօնին ժողովրդավարներու թեկնածու Թիմ Ուալզ ահազանգեց, թէ պաղեստինցիները եւս իրաւունք ունին խաղաղ ապրելու սեփական պետութեան մէջ, ուստի կարելի չէ թոյլատրել, որ երկար շարունակուի Կազայի մէջ եղածը: Իսկ արտաքին գործերու նախարար Անթոնի Պլինքըն յայտնեց, որ կարելի եղած է համաձայնիլ Կազայի մէջ զինադադար կնքելու համաձայնութեան 90 առ հարիւրին շուրջ, սակայն տակաւին առկայ են տարակարծութիւններ որոշ լուրջ թղթածրարներու շուրջ: «Կը շարունակենք խորհրդակցիլ մեր քաթարցի ու եգիպտացի գործընկերներուն հետ՝ առաջարկելով լուծումի յաւելեալ առաջարկներ», վստահեցուց Պլինքըն: Անոր համաձայն, եթէ զինադադար հաստատուի, ապա հնարաւոր կ’ըլլայ մինչեւ նախագահ Ճօ Պայտընի պաշտօնավարութեան աւարտը բնականոնացնել Իսրայէլ-Սէուտական Արաբիա յարաբերութիւնները:
Իսրայէլեան բանակը յայտարարեց Ժընինի մէջ իրականացուած զինուորական լայնածաւալ գործողութեան եզրափակումը: Գործողութիւնը սկսած էր 28 Օգոստոսին՝ ներառելով նաեւ Թուլքարմ եւ Թումաս շրջանները, ուր տեղի ունեցան սպանութիւններ, խուզարկումներ եւ բախումներ: Իսրայէլեան ռատիոկայանին համաձայն, այս գործողութիւնը կը համարուի մեծագոյնը 2002-ի «Պահապան պարիսպ» խորագրեալ յարձակումէն ի վեր:
Պաղեստինեան «Ուաֆա» լրատու գործակալութիւնը հաղորդեց, որ իսրայէլեան կրակոցներէն սպաննուած է պաղեստինցիներուն զօրակցելու համար Այսրյորդանան եկած թրքական արմատներով ամերիկացի կին մը: Միջադէպը տեղի ունեցած է Նապլուսի հարաւային շրջանին մէջ: Բժշկական ծառայութիւններուն համաձայն, 26 տարեկան ամերիկացին կը մասնակցէր իսրայէլեան բնակավայրերու ընդարձակումէն բողոքող ցոյցի մը, երբ ենթարկուեցաւ իսրայէլեան կրակոցներու եւ ծանր վիճակի մէջ փոխադրուեցաւ հիւանդանոց, ուր մահացաւ:
Համաս մեկնաբանեց ամերիկացի կնոջ սպանութիւնը եւ Ուաշինկթընի վարչակազմին կոչ ուղղեց «վերատեսութեան ենթարկելու իր կողմնակալ քաղաքականութիւնը, որուն հետեւանքով ամերիկացի մը մահացաւ իսրայէլեան կրակոցներով»:
