Ատրպէյճանի գլխաւոր դատախազ Քիամրան Ալիեւ յայտնեց, որ բռնագրաւուած Արցախի Հանրապետութեան նախկին ռազմաքաղաքական ղեկավարներու նախաքննութիւնը աւարտած է եւ անոնց գործերը յառաջիկային պիտի ուղարկուին դատարան:
Ատրպէյճանի գլխաւոր դատախազութիւնը քրէական գործեր յարուցած է բռնագրաւուած Արցախի նախկին ռազմաքաղաքական ղեկավարներէն 15-ին նկատմամբ: 2023 թուականի Սեպտեմբերին Արցախի Հանրապետութեան նկատմամբ Ատրպէյճանի իրականացուցած զանգուածային ռազմական յարձակման ու գրաւման հետեւանքով անոնք ապօրինաբար կալանաւորուած են եւ տարուած՝ Պաքու։ Անոնք մեղադրուած են ահաբեկչութեան, անոր ֆինանսաւորման, օրէնքով չնախատեսուած զինուած կազմաւորումներ ու խմբաւորումներ ստեղծելու, ահաբեկչութեան նպատակով վարժանքներ կայացնելու համար։
Այժմ Պաքուի մէջ ապօրինի կալանքի տակ են նախկին նախագահներ Արկադի Ղուկասեան, Բակօ Սահակեան եւ Արայիկ Յարութիւնեան, Ազգային ժողովի նախագահ Դաւիթ Իշխանեան, արտաքին գործերու նախկին նախարար Դաւիթ Բաբայեան, Պաշտպանութեան բանակի նախկին հրամանատար Լեւոն Մնացականեան, նախկին պետական նախարար Ռուբէն Վարդանեան եւ ԶՈՒ շտապի նախկին պետ Դաւիթ Մանուկեան:
