Հայաստանի արտաքին գործերու նախարարի տեղակալ Մնացական Սաֆարեանը չէ բացառած, որ Հայաստանի ու Ատրպէյճանի միջեւ հնարաւոր ճանապարհային հաղորդակցութիւններու անվտանգութեան ապահովումը կրնայ պատուիրակուիլ անվտանգութեան մասնաւոր գործակալութիւններու։
Մնացական Սաֆարեանը այդ մասին ըսած է Ազգային ժողովին մէջ լրագրողներու հետ զրոյցի ընթացքին՝ անդրադառնալով թեմային վերաբերեալ վարչապետ Նիկոլ Փաշինեանի կողմէ օրերս հնչեցուած յայտարարութեան։
Մնացական Սաֆարեան ընդգծաղ է՝ վարչապետ Նիկոլ Փաշինեան ըսած է, որ հաղորդակցութիւններու անվտանգութեան ապահովումը անվտանգութեան մասնաւոր գործակալութիւններուն պատուիրակելը հնարաւոր է։ «Այո՛, ըսած է, որ հնարաւոր է։ Եթէ յաւելեալ տեղեկատուութիւն ըլլայ, կը տեղեկացնենք։ Խօսուած է միայն անոր հնարաւորութեան մասին»,- նշած է արտաքին գործերու փոխնախարարը՝ յաւելելով, որ նման պարագային մասնաւոր անվտանգութեան ընկերութիւնը պէտք է պաշտպանէ նաեւ հաղորդակցութիւններու այն հատուածը, որ պիտի անցնի Ատրպէյճանի տարածքով։
Անդրադառնալով հարցին, թէ հաղորդակցութիւններու պաշտպանութեան իրաւունքը մասնաւոր ընկերութեան տալը չի՞ խախտեր երկրի ինքնիշխանութեան սկզբունքը՝ փոխնախարարը պատասխանած է․ «Ոչ, ի հարկէ չի խախտեր», եւ յաւելած է, որ սահմանին ներկայ պիտի ըլլան հայ սահմանապահներն ու մաքսաւորները։
Փոխնախարարին խօսքով՝ սա Հայաստանի կառավարութեան ներկայացուցած «Խաղաղութեան խաչմերուկ» նախագիծի տրամաբանութեան մէջ է, իսկ նախագիծին տրամաբանութիւնը յայտնի է բոլորին։
