Դպրոցական նոր՝ 2024-2025 տարեշրջանի սկիզբէն առաջ իսկ սկսած են կուտակուիլ բազում մարտահրաւէրներ: Սեփական վարժարաններուն մէջ պաշտօնավարող ուսուցիչներու սենտիքայի նախագահ Նաամէ Մահֆուտ ահազանգեց, թէ հանրային վարժարաններուն գոյութիւնը վտանգուած է, իսկ նոր տարեշրջանի ճակատագիրը՝ անորոշ, նիւթական միջոցներու անբաւարարութեան պատճառով: Ըստ Մահֆուտի, լիբանանցիները կ’ապրին քայքայուող պետութեան մէջ եւ ըստ երեւոյթին կարելի չէ խուսափիլ դժոխալի իրականութենէն:
Երէկ որոշ տեղեկութիւններ նշեցին նաեւ, թէ կրթութեան եւ բարձրագոյն ուսումի նախարարի պաշտօնակատար Ապպաս Հալապի որոշած է հրաժարիլ իր պարտականութիւններէն, որովհետեւ կարելի չէ եղած անհրաժեշտ գումարը ապահովել՝ աջակցելու համար դպրոցներուն եւ ուսուցիչներուն:
