Իսրայէլեան բանակը յայտարարեց, թէ լիբանանեան հողերէն շուրջ 65 հրթիռ արձակուած է իսրայէլեան սահմանային բնակավայրերուն ուղղութեամբ, որոնց մէկ մասը զսպուած է հակաօդային պաշտպանութեան համակարգերով: Իսկ թիրախ հասած հրթիռները յառաջացուցած են անտառային համատարած հրդեհներ: Հըզպալլա կը հակադարձէր հարաւային գօտիի գիւղերուն ուղղութեամբ իսրայէլեան շարունակական հարուածներէն եւ յայտարարեց, թէ «Քաթիւշա» տիպի բազմաթիւ հրթիռներ արձակած է սահմանամերձ դիրքերու վրայ: Առողջապահութեան նախարարութիւնը երէկ երեկոյեան յայտարարեց, թէ կին մը զոհուած է եւ երկու
քաղաքացիներ՝ վիրաւորուած, ներառեալ 12 տարեկան պատանի մը, հարաւային Քապրիխա շրջանին ուղղութեամբ իսրայէլեան ռմբակոծումին հետեւանքով: Իսրայէլեան ռումբերէն երէկ բաժին հասաւ նաեւ ԵՈՒՆԻՖԻԼ-ի խաղաղապահ ուժերուն հետ աշխատակցողներուն, որոնցմէ մէկը երէկ վիրաւորուեցաւ, մինչ կ’ուղղուէր սպանական գումարտակի կեդրոն՝ այնտեղ անհրաժեշտ աշխատանքներ իրականացնելու համար: Խաղաղապահ ուժերու բանբերի տեղակալին համաձայն, սոյն միջադէպը նմանօրինակ երկրորդն էր ընդամէնը երկու օրուան ընթացքին:
