Յափշտակութիւն, շորթում, խարդախութիւն եւ ապօրինի հարստացում: Միայն քանի մը օրինակ են Լիբանանի Կեդրոնական դրամատան նախկին կառավարիչ Ռիատ Սալամէի դիմագրաւած ամբաստանութիւններու երկար ցանկէն, որ դրամական հարցերու ընդհանուր դատախազ Ալի Իպրահիմ հրապարակեց երէկ՝ ձերբակալուած Սալամէի նկատմամբ: Իպրահիմ Սալամէն, նախնական հարցաքննութեան զեկոյցը եւ եւ ամբաստանագիրը յանձնեց Պէյրութի աւագ քննիչ Պիլալ Հալաուիին՝ պահանջելով հարցքննել նախկին կառավարիչը եւ զայն կալանաւորել: Կը սպասուի, որ Հալաուի այսօր սկսի ուսումնասիրել թղթածրարը եւ ծանօթանալ մանրամասնութիւններուն՝ ճշդելու համար հարցաքննութեան մօտալուտ թուական մը: Նոյն հարցով, «Ռոյթըրզ» լրատու գործակալութիւնը հաղորդեց, որ Սալամէ ձերբակալուած պիտի մնայ մինչեւ դատավարութեան նիստը, որուն թուականը տակաւին չէ յստակացած:
Արդարադատութեան նախարարի պաշտօնակատար Հանրի Խուրի մեկնաբանեց Ռիատ Սալամէի ձերբակալութիւնը, շեշտելով որ իրենք կը յարգեն դատական մարմիններուն բոլոր որոշումները:
