Հայաստանի Արտաքին գործերու նախարարութիւնը չի մեկնաբաներ, թէ արդեօք Պաքուի հետ կը քննարկուի Նախիջեւան-Սիւնիք-Ատրպէյճան ապագայ հաղորդակցութեան վերահսկողութիւնը մասնաւոր ընկերութեան փոխանցելու հարցը. Ան յայտնած է, որ Հայաստանի Հանրապետութիւնը կառուցողականօրէն ներգրաւուած է տարածաշրջանային կապուղիներու ապաշրջափակման ուղղութեամբ գործընթացին մէջ՝ որպէս հիմք ունենալով ինքնիշխանութեան ու ազգային իրաւազօրութեան յարգման, հաւասարութեան ու փոխադարձութեան սկզբունքներու վրայ կառուցուած տեսլականը։
Հայաստանի վարչապետ Նիկոլ Փաշինեան վերջերս յայտնեց, որ Հայաստանը «պատրաստ է ճանապարհներ տրամադրելու Նախիջեւանի հետ Ատրպէյճանի կապի համար` առանց մեր տարածքային ամբողջականութիւնը, սահմաններու անխախտելիութիւնը նսեմացնելու եւ կասկածի տակ դնելու»:
