«Ժատիտ» պատկերասփիւռի կայանը հաղորդեց, որ Լիբանանի Կեդրոնական դրամատան նախկին կառավարիչ Ռիատ Սալամէ ժամանած էր Արդարադատութեան պալատ, որպէսզի զինք հարցաքննէ Վճռաբեկ ատեանի դատախազ, դատաւոր Ժամալ Հաժժարը:
Սալամէի նկատմամբ հետաքննութիւնը կը վերաբերի Optimum Company-ի հարցին, Լիբանանի Կեդրոնական դրամատան եւ ընկերութեան միջեւ կնքուած պայմանագրերուն՝ կապուած գանձապետական պարտատոմսերու եւ ֆոնտով աւանդի վկայագրերու առուծախի, ինչպէս նաեւ ընկերութեան կողմէ միջնորդավճարներու ստացման:
Մամուլի տեղեկութիւններու համաձայն՝ հետաքննութենրն ետք Ռիատ Սալամէ ձերբակալուած է Վճռաբեկ ատեանի ազդանշանով եւ փոխադրուած է Ներքին ապահովութեան ուժերու կեդրոնատեղին։Լիբանանի վարչապետի պաշտօնակատար Նեժիպ Միքաթի «Հատաս» կայանին հետ զրոյցի ընթացքին յայտնեց, որ Սալամէի ձերբակալութիւնը դատական որոշում է եւ ինք պիտի չմիջամտէ: Ան շեշտեց նաեւ, որ «դատական իշխանութիւնը իր պարտականութիւնը կը կատարէ եւ մենք՝ բոլորս օրէնքի երդիքին տակ համահաւասար ենք»:
