Լիբանանեան աշխարահռչակ սննդատեսակները անգամ մը եւս փրկութեան կը հասնին բազմաթիւ այլ ոլորտներու մէջ որակազրկուած եւ իր անթիւ խնդիրներով ծանօթ Լիբանանին, այս անգամ «MEA» օդանաւային ընկերութեան շնորհիւ: MoneySuperMarket կայքը հրապարակեց օդանաւային թռիչքներու ընթացքին մատուցուած ուտելիքի որակին վերաբերող ուսումնասիրութեան մը արդիւնքները, ուր կ’երեւի, թէ լիբանանեան օդային փոխադրողը գրաւած է համաշխարհային առաջատար երրորդ դիրքը: Դասաւորումը կատարուած է հիմնուելով աւելի քան հարիւր օդանաւային ընկերութեամբ ճամբորդած ուղեւորներու շուրջ 27 հազար արժեւորումներուն եւ մեկնաբանութիւններուն վրայ:
Համաշախարհային առումով առաջին հանդիսացած է Քուէյթի օդանաւային ընկերութիւնը, 10-ի վրայ հաւաքելով 8,6-ի միջին մը: Երկրորդ դիրքի վրայ անոր մօտէն կը հետեւի Օմանի օդանաւային ընկերութիւնը (8,44/10), MEA-ի միջինը 8,39 է, իսկ 4-րդ եւ 5-րդ դիրքերը գրաւած են Ալճերիոյ օդանաւային ընկերութիւնը եւ AirBaltic-ը համապատասխանաբար: «Qatar», «Emirates» եւ «Etihad» ծանօթ ընկերութիւնները հանդիսացած են յաջորդաբար 14-րդ, 15-րդ եւ 18-րդ:
