Կազայի եւ Այսրյորդանանի մէջ զինուորական լայնածաւալ գործողութիւններու ձեռնարկող իսրայէլեան բանակի կեդրոնական ղեկավարութիւնը յայտարարեց, թէ Ժընինի մէջ իրականացուող գործողութիւնը յստակ ժամկէտ չունի, այլ պիտի աւարտի միայն նպատակներու իրագործումէն ետք: Նշենք, որ երէկ ամբողջացաւ Այսրյորդանանի հիւսիսային Ժընին, Թուլքարմ եւ Թուպաս շրջաններուն մէջ 2002-էն ի վեր մեծագոյն յարձակումին երրորդ օրը, մինչ պաղեստինեան կազմակերպութիւնները յայտարարեցին ինքնապաշտպանութեան երկրորդ փուլին անցնելու մասին, անոր տալով «Գաղթակայաններու սարսափ» խորագիրը: Իսկ պաղեստինեան առողջապահութեան նախարարութիւնը յայտարարեց, թէ նշեալ շրջանին մէջ ինկած զոհերուն թիւը բաձրացած է առնուազն 19-ի: Համաս շարժումի «Քասսամ» զինեալ թեւը յայտարարեց, թէ իր ղեկավարներէն «Ուիսամ Այման Խազէմ եւ երկու ընկերակիցներ ինկած են Ժընինի արեւելեան Զապապիտա գիւղին ուղութեամբ իսրայէլեան օդային հարուածի մը հետեւանքով», իսկ մէկ այլ հրամանատար՝Մոհամմատ Թուֆիք Աուֆի, մահացած է Թուլքարմի մարտերուն ընթացքին:
Իսրայէլեան կառավարութիւնը միւս կողմէ վաւերացուց օրինագիծ մը, որ կ’արտօնէ մինչեւ 2024-ի աւարտը զինուորագրել շուրջ 350 հազար պահեստայիններ:
