Լիբանանի Ելեկտրականութեան հաստատութիւնը երէկ յայտարարեց, թէ սկսած է դատարկել Լիբանան հասած քարիւղատար նաւը եւ անոր փոխադրած բեռը մթերել Զահրանիի եւ Տէյր Ամմարի ելեկտրակայաններու մթերանոցներուն մէջ՝ նշեալ կայանները շուտով վերագործարկելու եւ ընդհանուր առմամբ 465 քիլօուաթ ելեկտրականութիւն արտադրելու նպատակով: Ըստ հաստատութեան, այսօր արեւածագի ժամերէն սկսեալ լիաբանանեան բոլոր շրջաններուն մէջ կ’ակնկալուի ելեկտրամատակարարումի ժամերու յաւելում, միաժամանակ 24 ժամ ելեկտրականութիւն տրամադրելով օդակայանին, նաւահանգիստին, Ջուրի հաստատութիւններուն եւ կառավարական առաջին անհրաժեշտութեան այլ ենթակառոյցներու: Ըստ հաստատութեան, այս դրութիւնը կարելի պիտի ըլլայ շարունակել մինչեւ Իրաքի հետ վառելանիւթի համաձայնութեան վերականգնումը եւ քարիւղի Իրաքէն Լիբանան առաքումը:
