Իսրայէլեան բանակը յայտարարեց, թէ խոչընդոտած է սուրիական օդային տարածքէն ժամանող անօդաչու սարք մը, որ կը փորձէր օդային սահմանը հատել դէպի պաղեստինեան գրաւեալ հողեր:
Իսկ Եմէնի մէջ իշխող հուսիներու Անսարալլա կազմակերպութեան ղեկավար Ապտ էլ Մէլիք Պատր էլ Տին Հուսի ահազանգեց, թէ Իսրայէլ կը հատէ բոլոր կարմիր գիծերը եւ միջազգային օրէնքները: «Կազայէն Այսրյորդանան մոլեգնող բռնութիւնները կը բացայայտեն Իսրայէլի իսկական դիմագիծը եւ անոր ներկայացուցած վտանգը», ըսաւ Հուսի, իսրայէլեան ոճրագործութիւններու շարունակութիւնը համարելով ամօթ՝ մարդկութեան ճակատին: Անոր համաձայն, հուսիները կը շարունակեն իսրայէլեան ոճիրներուն հակադարձելու ծրագրաւորումը, որպէսզի ընտրուած պահը անակնկալ ըլլայ Իսրայէլին համար:
