Իսրայէլեան հրապարակներուն վրայ կը շարունակուին գերիներու ազատ արձակում պահանջող շարժումները: Գերիներու խումբ մը հարազատներ երէկ փորձեցին հատել Կազայի փշաթելը եւ մուտք գործել ռազմական գործողութիւններու տարածք, վարչապետ Պենիամին Նեթանիահուն պատասխանատու համարելով իրենց գերեվարուած ծանօթներուն անվտանգութեան: Անոնք կը պնդեն, որ Նեթանիահու շարունակաբար նոր նախապայմաններ առաջադրելով կը խափանէ գերիներու փոխանակումի համաձայնութեան մը կնքումը: Վարչապետը, իր կարգին, հերքեց Կազայի մէջ կարճատեւ զինադադար յայտարարելու մտադրութիւնը, թէեւ իսրայէլեան լրատուամիջոցներ հաղորդած էին, որ ամերիկացիները կ’առաջարկեն կարճատեւ զինադադար մը, որպէսզի մարդասիրական կազմակերպութիւնները կարենան փոլիոյի դէմ պատուաստել պսղեստինցի երեխաները:
Իսկ պաշտպանութեան նախարար Եոաւ Կալանթ նշեց, թէ որոշուած է ապահովական նախապատրաստութիւնները խստացնել հիւսիսային եւ հարաւային բնակավայրերուն մէջ, որպէսզի երեխաները կարենան յառաջիկայ շաբաթ վերադառնալ դպրոց:
Մարդասիրական մտահոգութեամբ, ՄԱԿ-ի Սնունդի համաշխարհային ծրագիրը որոշեց անժամկէտ առկախել Կազայի իր աշխատանքները, որովհետեւ կազմակերպութեան բեռնակառքերէն մէկը ենթարկուած է իսրայէլեան կրակոցի:
