Հայաստանի վարչապետ Նիկոլ Փաշինեան հիւրընկալեց պաշտօնական այցելութեամբ Երեւան գտնուող Ուրուկուէյի Ներկայացուցիչներու պալատի նախագահ Անա Օլիվերան եւ անոր տեղակալը: Վարչապետը ողջունեց պատուիրակութեան Հայաստան այցելութիւնը եւ ընդգծեց երկու երկիրներուն միջեւ ջերմ ու բարեկամական յարաբերութիւններու առկայութիւնը: Ան յիշեցուց որ Ուրուկուէյ դժուար օրերուն միշտ կանգնած է Հայաստանի ու հայ ժողովուրդի կողքին, հետեւաբար Երեւան կը կարեւորէ զանազան ոլորտներու մէջ երկկողմանի յարաբերութիւններու զարգացումն ու ամրապնդումը:
Օլիվերա, իր կարգին, շնորհակալութիւն յայտնեց ջերմ հիւրընկալութեան համար, աւելցնելով որ իրենք անցեալի նման այսօր եւս աջակցութիւն կը յայտնեն Հայաստանին ու հայութեան: Ան գոհունակութեամբ նշեց, որ խորհրդարանական համագործակցութիւնը կը գտնուի բարձր մակարդակի վրայ: Զրուցակիցները անդրադարձան հայ-ատրպէյճանական խաղաղութեան պայմանագրի քննարկումներուն, Արցախի բռնի տեղահանուածներուն տրամադրուած օգնութիւններուն եւ երկու երկիրները հետաքրքրող այլ նիւթերու:
