Կազայի մէջ շարունակուող ամէնօրեայ բախումներուն զուգահեռ, երէկ մագլցողական ընթացք ստացան նաեւ Այսրյորդանանի որոշ շրջաններուն մէջ բռնկած մարտերը:
Իսրայէլեան բանակը յայտարարեց, թէ Այսրյորդանանի հիւսիսային շրջաններուն մէջ իրականացուող զինուորական գործողութեան ընթացքին վիրաւորուած է երկու զինուոր: «12 պաղեստինցի սպաննեցինք եւ աւելի քան 10 կասկածելի ձերբակալեցինք Ժընինի եւ Թուլքարմի մէջ», յայտարարեց իսրայէլեան բանակը՝ խօսելով Այսրյորդանանի գործողութեան մասին: Ըստ բանակին, պաշարուած Նուր Շամս գաղթակայանի մէկ մզկիթին մէջ երէկ սպաննուած է հինգ պաղեստինցի՝ ներառեալ շրջանի ջոկատի հրամանատար Մոհամմատ Ժապէր Ապու Շուժահը: Շուտով, Ժիհատ շարժումի «Երուսաղէմի փաղանգներ» զինեալ թեւի Թուլքարմի ջոկատը յայտարարեց, թէ իսրայէլացի խումբ մը զինուորներու վրայ կրակ բացած է Թուլքարմի մէջ եւ պատճառած է ծանր վնաս, որպէս հակադարձութիւն ջոկատի հրամանատար Ապու Շուժահի ահաբեկումին:
Իսրայէլեան լրատուամիջոցներ հաղորդեցին, որէ բանակը Օգոստոսին 15 զինուոր կորսնցուցած է Կազայի եւ Լիբանանի ճակատներուն վրայ, հետեւաբար, իսրայէլեան բանակին համար այս ամիսը կը համարուի պատերազմի ամէնէն արիւնալիներէն մէկը:
