Իրանի նախագահ Մասուտ Փեզեշքիան յայտնեց, որ Իրան կը ձգտի խաղաղութեան, մերժելով բռնութիւնները որեւէ վայրի մէջ, ուստի պատրաստ է համագործակցելու ՝ աշխարհի պատերազմները եւ բռնութիւնները դադրեցնելու ուղղութեամբ: Նորվեկիոյ վարչապետին հետ ունեցած հեռաձայնային հաղորդակցութեան ընթացքին, Իրանի նախագահը յայտնեց, որ Թեհրանի քաղաքականութիւնն է լարուածութենէն եւ առճակատումէն խուսափումը, ինչպէս նաեւ արտերկրի հետ դրական յարաբերութիւններու մշակումը, սակայն այդ վարքագիծը պիտի փոխուի, եթէ Իրանի նկատմամբ խստանայ պատժամիջոցներու եւ ճնշումներու ռազմավարութիւնը: Յիշեցնելով, որ Ուաշինկթըն լուռ կը մնայ Կազայի մէջ տեղի ունեցածին նկտամամբ, Իրանի նախագահը Միացեալ Նահանգներն ու շարք մը այլ երկիրներ ամբաստանեց Իսրայէլի եւ Կազայի հարցով երկակի քաղաքականութիւն որդեգրելու մէջ:
