Մինչ Կազայի պատերազմը կը մօտենայ իր առաջին տարելիցին, իսրայէլեան բանակը երէկ կեդրոնացումը ուղղեց Այսրյորդանանի հիւսիսային հատուածին եւ զինուորական լայնածաւալ գործողութիւն մը իրականացուց Ժընինի, Թուլքարմի եւ մերձակայ շրջաններուն մէջ, ուր ծանր բախումներ տեղի ունեցան պաղեստինեան կազմակերպութիւններուն հետ: Պաղեստինեան կարմիր մահիկը յայտարարեց, թէ իսրայէլեան ուժերը երէկ նշեալ շրջանին մէջ սպաննած են 9 պաղեստինցի եւ կը պաշարեն հիւանդանոցները՝ կանխելու համար վիրաւորներուն փոխադրութիւնը: Ժիհատի «Երուսաղէմի փաղանգներ» զինեալ թեւը յայտարարեց, թէ Ժընին եւ Նուր Շամս գաղթակայաններու բախումներուն ընթացքին կործանած է իսրայէլեան անօդաչու սարք մը եւ ծանր մարտեր մղած է յարձակող ուժերուն դէմ:
Համաս շարժումը Այսրյորդանանի պաղեստինցիներուն կոչ ուղղեց տեղաշարժի եւ դիմադրութեան՝ զսպելու համար իսրայէլեան բանակին եւ տեղաբնիկներուն շարունակական ոտնձգութիւնները:
Իսկ Միացեալ Նահանգներու Արտաքին գործերու նախարարութիւնը յայտարարեց, թէ նոր պատժամիջոցներ սահմանած է իսրայէլացի տեղաբնիկներու նկատմամբ՝ պաղեստինցիներուն դէմ յարձակումներ գործելու մեղադրանքով: Ըստ նախարարութեան, նոր պատժամիջոցները կը թիրախաւորեն մանաւանդ ոչ-կառավարական Հաշոմիր կազմակերպութիւնը, որ ֆինանսաւորած է ապօրինի գաղթակայաններու կառուցումը:
