Ամերիկեան հետախուզական կեդրոնական գործակալութեան (CIA) փոխտնօրէն Տէյվիտ Քոհեն յայտնեց, որ Կազայի մէջ յայտարարուելիք զինադադարին ճակատագրին վերաբերող հարցադրումները պէտք է ուղղուին Համասի ղեկավարութեան: Հետախուզութեան եւ ազգային անվտանգութեան հարցերու մասին գագաթաժողովի մը ծիրին մէջ Քոհեն յայտնեց, որ «իսրայէլացիները բանակցութիւններուն ընթացքին կը ցուցաբերեն լրջութիւն», ուստի բոլոր հայեացքները ուղղուած են Համասի պատասխանին: Նշենք, որ ամերիկեան, եգիպտական ու քաթարեան միջնորդութեամբ Տոհայի ու Գահիրէի մէջ տեղի կ’ունենան խորհրդակցական հանդիպումներ, թէեւ պաղեստինեան շարժումը կը բացակայի քննարկումէն:
Միաժամանակ, ամերիկեան Սպիտակ տան մէջ գործող Ազգային անվտանգութեան խորհուրդի բանբեր Ճոն Քիրպի վերահաստատեց, որ Ուաշինկթըն պիտի պաշտպանէ իսրայէլեան շահերը, եթէ Իրան յարձակում գործէ անոր վրայ, ինչպէս կը սպառնան իրանցի պատասխանատուները:
