Ազգային ազատ հոսանքի նախագահ, երեսփոխան Ժըպրան Պասիլ վերահաստատեց, որ լիբանանցիները կը զօրակցին պաղեստինցիներուն եւ պատմականօրէն վճարած են անոր սուղ գինը: Նշելով, թէ Իրան, Իրաք եւ Սուրիա տակաւին մաս չեն կազմած պատերազմին, Պասիլ հարց տուաւ, թէ «ինչո՞ւ Լիբանան պէտք է առանձին կրէ այս բեռը»: Անոր համաձայն, ժամանակը եկած է արժեւորելու, թէ Կազային զօրակցելու համար մղուած այս պատերազմը ինչ արդիւնք տուած է Լիբանանին եւ ինչ հետեւանքներու առաջնորդած: «Մենք ապացուցեցինք, որ Դիմադրութեան կողքին ենք եւ Հըզպալլան կը համարենք իսրայէլեան ոտնձգութիւնները կանխող ուժ, սակայն ինչ իմաստ ունի Լիբանանի ճակատագիրը առնչել այլոց ճակատագրին», հարց տուաւ Ազգային ազատ հոսանքի ղեկավարը:
