Որպէս շարունակութիւն 2023-ի Հոկտեմբերէն ի վեր լիբանանեան թիրախներու դէմ իր որդեգրած գլխաւոր ռազմավարութեան, իսրայէլեան բանակը երէկ յայտարարեց, թէ Լիբանան-Սուրիա սահմանային գօտիին վրայ ահաբեկած է Ժիհատ շարժումի գործողութիւններու պատասխանատու Ֆէրիս Քասէմը: Ըստ իսրյաէլացիներուն, Քասէմ պատասխանատու էր Սուրիոյ եւ Լիբանանի մէջ Ժիհատի գործողութիւններու ծրագրումին եւ գործադրութեան, ինչպէս նաեւ կարեւոր դեր խաղացած էր ի նպաստ Հըզպալլային պաղեստինցի զինեալներ զինուորագրելու աշխատանքին մէջ: «Նոյն հարուածով Քասէմի կողքին մահացաւ քանի մը զինեալ եւս», յայտարարեց Իսրայէլ՝ աւելցնելով, որ Ժիհատի անդամները Դամասկոսէն կ’ուղղուէին Լիբանան՝ հրթիռարձակումի գործողութիւններ կատարելու համար: Իր կարգին, Դամասկոսի գիւղական Տիմաս շրջանի քաղաքապետը յայտնեց, որ Դամասկոսէն Պէյրութ ճամբուն վրայ տեղի ունեցած իսրայէլեան գործողութենէն մահացած է չորս մարդ:
Իսրայէլեան օդուժը նախապէս Ռաս Պաալպաքի բարձունքներուն վրայ թիրախաւորած էր բեռնակառք մը, որուն վարորդը անվնաս փրկուած է: Հարաւի մէջ ալ իսրայէլեան անօդաչու սարքերն ու ռազմական օդանաւերը շարք մը յարձակումներ գործեցին արեւմտեան հատուածի գիւղերուն վրայ:
