Հայաստանի հետ խաղաղութեան պայմանագրի մշակումը մօտ է աւարտին, սակայն «մենք պէտք է վստահ ըլլանք, որ ատիկա յարատեւ խաղաղութիւն պիտի ըլլայ», հարաւքորէական «Korea Times» թերթին տուած հարցազրոյցին յայտնած է Ատրպէյճանի նախագահի յատուկ յանձնարարութիւններով ներկայացուցիչ Էլչին Ամիրպեքովը՝ կրկնելով Հայաստանի Սահմանադրութեան փոփոխութեան մասին Պաքուի նախապայմանը։
«Խաղաղութեան պայմանագրի կնքման ճանապարհին մնացած խոչընդոտը Ատրպէյճանի տարածքի հանդէպ Հայաստանի սահմանադրական պահանջն է։ Երբ այս հարցը լուծուի, մենք կարող ենք յառաջ շարժիլ»,- նշած է ատրպէյճանցի պաշտօնեան։
Հայաստանի իշխանութիւնը Սահմանադրութեան փոփոխութիւնը կը համարէ իր ներքին հարցը, իսկ զայն փոխելու Պաքուի պահանջները կ’որակէ անընդունելի:
Ամիրպեքով նաեւ բացառած է Երեւանի եւ Պաքուի միջեւ միջնորդներու մասնակցութեամբ բանակցութիւններու կազմակերպումը. «Մենք չենք ակնկալեր, որ որեւէ միջազգային կազմակերպութիւն կամ երրորդ կողմ ուղղակի դերակատարութիւն կրնայ ունենալ, խաղաղութեան ճանապարհին երկու պետութիւններուն աջակցելէ բացի»։
