ԵԽԽՎ-ի նախագահ Թէոտորոս Ռուսոփուլոսը արձագանգած է Ատրպէյճանի Արտաքին գործերու նախարարութեան յայտարարութեան, թէ Եւրոպայի խորհուրդի խորհրդարանական վեհաժողովի (ԵԽԽՎ) որոշ անդամներ Ատրպէյճանի մէջ «անբաղձալի անձնաւորութիւն» յայտարարուած են:
«Սա աւելի քան ցաւալի ազդանշան է, որ միայն կը բարդացնէ Ատրպէյճանի ներկայիս դրութիւնը ԵԽ-ի մէջ։ Անդամ երկիրները պարտաւորուած են պահպանել ժողովրդավարութեան չափանիշերը. իրենց խղճին համաձայն քուէարկածներու սեւ ցուցակը կրնայ յանգեցնել միայն հակառակ արդիւնքի»,- գրած է ան X-ի իր էջով:
Յիշեցնենք, որ նախօրէին Ատրպէյճանի Արտաքին գործերու նախարարութեան խօսնակը յայտնած էր, որ 2024 թուականի Յունուարին ԵԽԽՎ-ի մէջ ատրպէյճանական պատուիրակութիւնը ձայնի իրաւունքէն զրկելու օգտին քուէարկած պատգամաւորներուն թոյլ պիտի չտան Ատրպէյճան մտնելու։
ԵԽԽՎ պատգամաւորներու այս որոշման պատճառը Ատրպէյճանի կողմէ որպէս ԵԽ անդամի իր պարտաւորութիւններու համակարգուած խախտումն էր։
