Ռուսիոյ Պաշտպանութեան նախարարութիւնը յայտարարեց, թէ բանակը տիրապետած է Ուքրանիոյ Տոնեցք շրջանի Օրլովքա քաղաքին, ուքրանական ուժերուն դէմ մղուած ծանր մարտերէ ետք: Ըստ Մոսկուայի, գործողութիւններուն ընթացքին գորղծածուած են գերարդիական դիպուկ հրթիռներ՝ ներառեալ «Քինկալ»-ը, կործանելու համար ուքրանական ուժանիւթային այն ենթակառոյցները, որոնք կը ծառայեն նաեւ ռազմամթերք արտադրող գործարաններուն: Ուքրանիոյ բանակը միւս կողմէ յայտարարեց, թէ կործանած է հինգ հրթիռ եւ 60 անօդաչու սարք, որ ռուսերը արձակած են ուքրանական թիրախներու ուղղութեամբ: Ըստ ուքրանական օդուժի հրամանատարին, ռուսերը 26-27 Օգոստոսի գիշերը արձակած են 10 հեռահար հրթիռ եւ 81 անօդաչու սարք:
