Միացեալ Նահանգներու ազգային անվտանգութեան հարցերով խորհրդական Ճէյք Սալիվըն յայտնեց, որ Ուաշինկթըն կը փորձէ Չինաստանի հետ իր յարաբերութիւնները տնօրինել պատասխանատու եւ խոհեմ ձեւով: Սալիվըն ժամանեց Փեքին, ուր չինացի բարձրաստիճան պաշտօնատարներու հետ պիտի քննարկէ տարակարծութեան առարկայ հանդիսացող նիւթերը եւ յարաբերութիւններու լարուածութիւնը մեղմելու հնարաւորութիւնները, նախքան 5 Նոյեմբերին կայանալիք ամերիկեան նախագահական ընտրութիւնը: Չինաստանի հետ զինուորական մակարդակի երկխօսութիւնը քաղաքականի բարձրացնելու ամերիկեան քայլը կը միտի կանխել որոշ շրջաններու շուրջ հակամարտութիւններու բռնկումը, ներառեալ Թայուանը:
Չինաստանի արտաքին գործերու նախարար Ուանկ Եի իր կարգին յայտնեց, որ Փեքին կը փորձէ բարելաւել ամերիկացիներուն հետ կապերը եւ հասնիլ կայուն յարաբերութիւններու: Այսուհանդերձ, Ճափոն իր դժգոհութիւնը յայտնեց տարածաշրջանին մէջ չինական կործանիչներու վտանգաւոր թռիչքներէն: Կառավարութեան բանբերը ահազանգեց, թէ չինական կործանիչ մը մուտք գործած է Ճափոնի օդային տարածք, տեղի ունեցածը համարելով գերիշխանութեան վտանգաւոր խախտում:
